உடன்பிறந்தார் அனைவருமே நல்லவர் அல்லர் !
-----------------------------------------------------------------------------------------
கி.பி.9-ஆம்
நூற்றாண்டுக்குப் பிந்திய காலத்தில் வாழ்ந்தவர் ”மூதுரை”யைப் படைத்த ஔவையார். இவருக்கு முற்பட்ட காலத்தில்
ஔவையார் என்ற பெயரில் சில புலவர்கள் வாழ்ந்திருக்கின்றனர். 30 பாடல்களைக் கொண்ட இந்நூலில்
பல அரிய கருத்துகளைக் கொண்ட பாடல்கள் உள்ளன. அதிலிருந்து ஒரு
பாடல்:-
----------------------------------------------------------------------------------------
பாடல்.(20)
----------------------------------------------------------------------------------------
உடன்பிறந்தார் சுற்றத்தார் என்றிருக்க
வேண்டா
உடன்பிறந்தே கொல்லும் வியாதி – உடன்பிறவா
மாமலையி லுள்ள மருந்தே பிணிதீர்க்கும்
அம்மருந்து போல்வாரு முண்டு !
----------------------------------------------------------------------------------------
சந்தி பிரித்து எழுதிய பாடல்:
----------------------------------------------------------------------------------------
உடன்பிறந்தார் சுற்றத்தார் என்று
இருக்க வேண்டா;
உடன் பிறந்தே கொல்லும் வியாதி; உடன் பிறவா
மா மலையில் உள்ள மருந்தே பிணி
தீர்க்கும்;
அம் மருந்து போல்வாரும் உண்டு !
-----------------------------------------------------------------------------------------
வியாதி = இது வடசொல். தமிழன்று. நோய், பிணி
என்பவை ஈடான தமிழ்ச் சொற்கள்.
-----------------------------------------------------------------------------------------
அருஞ்சொற்பொருள்:
-----------------------------------------------------------------------------------------
வியாதி = நோயானது ; உடன் பிறந்தே கொல்லும் = உடம்புடன் பிறந்தே அதனைக்
கொல்லுகின்றது ; (ஆதலால்) உடன்
பிறந்தார் = உடன்பிறந்தவர் எல்லோரும் ; சுற்றத்தார் என்று இருக்க வேண்டா = (நன்மை செய்யும்)
சுற்றத்தார் என்று கருதியிருக்க வேண்டுவதில்லை ; உடன் பிறவா = உடன் பிறவாத ; மா
மலையில் உள்ள மருந்தே பெரிய மலையில் இருக்கின்ற மருந்தே ; பிணி
தீர்க்கும் = நோயைப் போக்கும் ; அம்மருந்து
போல்வாரும் உண்டு = அம் மருந்து போல் (அயலாராக
இருந்தும்) உதவி செய்வாரும் சிலர் உண்டு.
----------------------------------------------------------------------------------------
பொருளுரை:
----------------------------------------------------------------------------------------
நோயானது உடம்புடன் பிறந்தே அதனைக் கொல்லுகின்றது. அதுபோல் உடன் பிறந்தவர்களுள்ளும் நமக்குத் தீமை செய்பவர்களும் உளர். உடன்பிறந்தவர்கள் எல்லோருமே நமக்கு நன்மை செய்யும் சுற்றத்தார் என்று கருதலாகாது !
உடன் பிறவாவிடினும் மலையிலுள்ள மூலிகைகள், நம்மைப் பீடித்துள்ள
நோய்களைத் தீர்க்க உதவுகின்றன. அதுபோல் உடன்பிறவாத அயலாருள் சிலரும் கூட நமக்கு உதவி
செய்வது உண்டு ! அயலாராயிருந்தும் நமக்கு நன்மை
செய்பவர்களும் இருக்கிறார்கள் !
-----------------------------------------------------------------------------------------
கருத்துச் சுருக்கம்:
-----------------------------------------------------------------------------------------
உடன்பிறந்தோருள் தீமை செய்வோரும்
உண்டு ; அயலாருள் நன்மை
செய்வோரும் உண்டு !
-----------------------------------------------------------------------------------------
ஆக்கம் + இடுகை:
வை.வேதரெத்தினம்,
(veda70.vv@gmail.com)
ஆட்சியர்,
"மூதுரை” வலைப்பூ,
[தி.ஆ:2052, சிலை (மார்கழி) 04]
{19-12-2021}
-----------------------------------------------------------------------------------------
