நஞ்சுடைய நாகப் பாம்பு புதருக்குள் மறைந்து வாழும் !
-----------------------------------------------------------------------------------------
கி.பி.9-ஆம்
நூற்றாண்டுக்குப் பிந்திய காலத்தில் வாழ்ந்தவர் ”மூதுரை”யைப் படைத்த ஔவையார். இவருக்கு முற்பட்ட காலத்தில்
ஔவையார் என்ற பெயரில் சில புலவர்கள் வாழ்ந்திருக்கின்றனர். 30 பாடல்களைக் கொண்ட இந்நூலில்
பல அரிய கருத்துகளைக் கொண்ட பாடல்கள் உள்ளன. அதிலிருந்து ஒரு
பாடல்:-
-----------------------------------------------------------------------------------------
பாடல்.(25)
-----------------------------------------------------------------------------------------
நஞ்சுடைமை தானறிந்து நாகங்
கரந்துறையும்
அஞ்சாப் புறங்கிடக்கும் நீர்ப்பாம்பு – நெஞ்சிற்
கரவுடையார் தம்மைக் கரப்பர் கரவார்
கரவிலா நெஞ்சத் தவர் !
----------------------------------------------------------------------------------------
சந்தி பிரித்து எழுதிய பாடல்:
----------------------------------------------------------------------------------------
நஞ்சு உடைமை தான் அறிந்து நாகம்
கரந்து உறையும்
அஞ்சாப் புறம் கிடக்கும் நீர்ப்பாம்பு
_ நெஞ்சில்
கரவு உடையார் தம்மைக் கரப்பர் கரவார்
கரவு இலா நெஞ்சத்தவர் !
------------------------------------------------------------------------------------------
அருஞ்சொற்பொருள்:
------------------------------------------------------------------------------------------
நாகம் = நஞ்சு உடைய நாகப் பாம்பானது ; தான் நஞ்சு உடைமை அறிந்து = தான் நஞ்சு உடையதாய்
இருத்தலை அறிந்து ; கரந்து உறையும் = மறைந்து
வழும் ; நீர்ப்பம்பு = (நஞ்சில்லாத)
தண்ணீர்ப் பாம்பானது ; அஞ்சா புறம் கிடக்கும் =
அச்சமின்றி வெளியே கிடக்கும் ; (அவை போல்)
நெஞ்சில் கரவு உடையார் = மனத்தில் வஞ்சனையை
உடையவர் ; தம்மைக் கரப்பர் = தம்மைத்
தாமே மறைத்துக் கொள்வர் ; கரவு இலா நெஞ்சத்தவர் = வஞ்சனை இல்லாத மனத்தை உடையவர் ; கரவார் = தம்மை மறைத்துக் கொள்ளார்.
------------------------------------------------------------------------------------------
பொருளுரை:
------------------------------------------------------------------------------------------
தன்னிடம் நஞ்சு இருப்பதால், தன்னைக் கண்டால் மக்கள் அடித்துக் கொல்வர் என்று அஞ்சி நச்சுப் பற்களையுடைய நாகப் பாம்பு புதருக்குள் மறைந்து வாழும் ! அதைப்போல, நெஞ்சில் வஞ்சக எண்ணம் கொண்ட கீழோர், வெளிப்படையாகப் பழகாமல் தன்னைத் தானே தனிமைப்படுத்திக் கொண்டு, பிறரிடமிருந்து ஒதுங்கி வாழ்வர் !
தன்னிடம் நச்சுப் பற்கள் இல்லை
என்பதால், தன்னைக் கண்டால்
மக்கள் அச்சம் கொண்டு அடித்துக் கொல்ல மாட்டார்கள் என்பதை உணர்ந்து தண்ணீர்ப் பாம்பானது அஞ்சாமல் வெளியில் புழங்கும்
! அதைப்போல, நெஞ்சில் வஞ்சக
எண்ணமில்லாத நல்லவர்கள், பிறரிடமிருந்து ஒதுங்காமல் ஒன்றியே
வாழ்வார்கள் !
------------------------------------------------------------------------------------------
கருத்துச் சுருக்கம்:
------------------------------------------------------------------------------------------
வஞ்சனை உடையவர் மறைந்து ஒழுகுவார் ; வஞ்சனை இல்லாதவர்
வெளிப்பட்டு ஒழுகுவார் !
------------------------------------------------------------------------------------------
ஆக்கம் + இடுகை:
வை.வேதரெத்தினம்,
(veda70.vv@gmail.com)
ஆட்சியர்,
”மூதுரை” வலைப்பூ,
[தி.ஆ:2050 : சிலை (மார்கழி) 03]
{18-12-2021}
-----------------------------------------------------------------------------------------
கருத்துகள் இல்லை:
கருத்துரையிடுக